سرسمله مه

لعنت اوخویوم؟     کیمه؟        نیه؟                                  

یوخ من راحاتام. بیر آز گرگین،بیر آز یورقون بیر آز دا دالغینام.

نه ائدیم؟ نه ائده بیلرم کی؟ یوخ شعار وئرمیرم. دوشونورم. و هله دوشونمک قابلیتیمی الدن وئرمه دییبم اوچون و دوشونمک اوزگورلویومو الیمده توتماغیمدان شادام.

دون گئجه یازدیغیم بیر نئچه حئکایه می و بیر سورو شعریمی جیریب زیبیل دولچاسینا سالدیم. هه.. یئددی کیلو کیتابی دا کیلوسو ۵۰ تومن دن ساتدیم. بو کیتابلارین یئری همیشه لیک منیم کیتاب رف لریمده بوش قالاجاق. بیرده کی ۳۵۰ تومنی ده اونلارین بوش یئرینه قویدوم.

نه ائدیم؟

 الکتریک کیتاب کارتیمین شارژی قالیر. دوشونورم صاباح گئدیم اختره و دولدورما بئش اون کیتاب آلام.

اوشاق کیتابلاریم دا اوزوم کیمی یاریم جان قالیب. نه چیخاجاقلاری نه ده چیخمایاجاقلاری بللی دئییل.

جهانا سیغیب حتی بیر شهرین ۵۰ مئتره لیک آپارتمانیندا دا دونیامیزی قوروروق. من بو شهری و بو توپراقی سئویرم و بوردا یاشایان اومودسوز خالقی دا.

تانیدیغیم بیریسی داهی بورالاری به ینمه ییر.

من دوشونورم بو تانیش بیزیم موسیقی نی ائشیدنده اگر لذت دن باشقا دونیایا گئدیرسه، بیزیم شعیرلری اوخویورسا عالم لری سیر ائدیرسه و..  و گوزو بیزیم خالق ایچین یاشلانیرسا ندن بئله اولوب؟!

بلکه بو تانیش بیزیم چوخوموزا تای تقلید ائتمک اوچون و شهرت قازانماق اوچون وطن وطن دئییرمیش و بلکه ده نه بیلیم من یانلیش دوشونورم. بلکه دونیا بئله دیر اصلینده. بویوک بویوک دانیشانلار کیچیک کیچیک یاشارمیشلار!

ساغ قالین - ساغ قالین

ایسته سن ده بودور

ایسته مه سن ده!

یوخسول بیر عایله اوولادی اولدوغوم اوچون چوخ زامانلار ایسته دیکلریمی الده ائده بیلمز ایدیم. داها دوغروسو ایستک لریم یالنیز خیال دونیاسیندا گئرچکله شه بیلردی.

و من ایناندیم کی بو دونیادا یالنیز گوجلولر حاقلی دیرلار. ایناندیم کی قوراللار یالنیز بیزیم کیمی لره گوره دیر. ایناندیم کی یالنیز بیزلر یالانین یانلیش اولدوغونا اینانمالییق.

ایناندیم کی یالنیز بیز قایدا قانونا اویمالییق و بیزه بونلاری اویدورانلار هئچ زامان و هئچ زامان یاراتدیقلاری قایدالارا اویمازمیشلار. من گئرچه یی گورورم. من دوغرویو آنلاییرام. من سنی دوشونورم آنجاق نه ائدیم کی ایسته سن ده بودور ایسته مه سن ده!

اوشویورسن اوزاقلاردان
جیبینده کی بو آدرسی آختاریرسان
سون خیاوان بوشا چیخمیش
نه تئز شهر قورتولمادا!
یاواشجاسی بیر سوز دئییم
اینانمیرسان الینده کی سیقارانین ایستیسینه
اینانمیرسان.
* * *
داغیلیبسان بوشلوقلارا- بو شهرین توستوسونه
قویون کیمی بیر قصابین توکانیندا
سویون حاضیر - گوزون ندن قارالماییر.
بویونونداکی ایپین بوشدور.
اختیارسیز یاشامانین لذتینی سن بیلیرسن.
یانیلمیشام بیر آز دایان!
بو ذیلتین نیفرتینی سن بیلیرسن!

سئومک و دوشونمه مک

سئومه مک و دوشونمک

بودور بیزیم عصانیمیز عصریمیزه. بیز عصیرلر بویو  اینسان سوروسونون و دوشونجه شپه سینین قوربانلارییق. بیر گون زورلا آدلاریمیز حارام اولدو و سونرا یئنی دن دوغولدوق

من دوشونورم ده هارا گئدیریک. بو دمیر لر دن و بتن لاردان قورتولوشو دوشونورم. یوروقون دئییلم. آنجاق یورولموشام سینیق سالخاق دونیادان. و ساختالانمیش دوغرولاردان. حتی من بونا اینانیرام کی یئر اوزونده  ائله ایندی داها گئج اولوب دو. اینانیرام کی اینسانلیق دئیه بیر شئی قورالدیر. بعضا اینسانلارین یالنیز اشارت دیلینه بلد اولدوقلارینی آرزیلاییرام. و بعضا سرسم سرسم دوشونورم.

آه نه قدر آغیردیر یوکوموز!

۱۶ گون اوزومه قوناق گئتدیم

تاری سیزی ایناندیرسین بو ایل اوغوز بایرامی عومرومون ان اوزون تعطیللری اولدو. یعنی ائله اوزومو تانییاندان بوگونه قدر ۱۶ گون بیردن تعطیل ائدیب اوزوم اوچون یاشامامیشدیم.

نه ائله مک بو مملکت ده عایله وین وار دولتی اولماسا و ده سن ۹ یاشیندان درس له برابر ایشله مه یه مجبور فالسان بئله اولار دا.

دوستلاردان کیمی سی کیش جزیره سینه کیمی سی آنتالیایا کیمی سی استانبولا کیمی سی ده باکیا گئدیب اورادا اگلنجه یه مشغول اولدولار آنجاق من بو ۱۶ گونده اوزومه قوناق گئتدیم.

اوزومه قوناق گئتدیم و گوردوم کی نقدر اوزاقدا قالمیشام. ایل بویو هر گون لاپ چوخ یاتان زامان گونده ۶.۵ یادا ۷ ساعات یاتاردیم آنجاق بو ۱۶ گونده لاپ یوخودان دویدوم. هه بونو دا دئییم کی ۶-۷ آیدان بری الیمده یاریمچیق قالمیش بیر نئچه کیتابیم دا واریدی اونلاری دا قورتاردیم. بو کیتابلار کوهنه بورج کیمی دای منی داریخدیرماغا باشلامیشدیلار.

دونن گوزگویه باخاندا باشیمدا نئچه تئلین آغارماسینی گوردوم. هله ساققالیمدا سکیز دوققوز آغ توکون اولماسینی گیزلدیرم

درین  درین  دالیرام   چوخ    دایازدا   سورما منی   

سوروش صاباح شفقین هئی دونن ده یورما منی

باخیر     گئجه   اوزومه  ،   ال - آمان  دویور قلبیم

درین لیگیمده     بوغولسام    آیازدا   گورمه منی

 

هامی بو دونیادان کوچه جک!

هامی بو سوزو دئییر. آنجاق دوغرودان بیزیم بونا نه قدر اینانجیمیز واردی. داها دوغروسو اصلا بیز بو دونیادان کوچمه یه حاضیریق؟! من بوردا دینی فلسفی اینانجلارا توخونماق ایسته میرم. بلکه بونلار منیم صلاحیتیمده دئییل.

آنجاق منیم ذهنیمده اولان مسئله بودور کی بیز دوغرودان اولوم حاقیندا نئجه دوشونوروک. من بیلسم کی ائله ایندی بئش دقیقه سونرا داهی روحوم بدنیم دن آیری اولاجاق نه حالا قالارام.

بیز اولومه اینانمیریق. اولومو چئوره میزده گوروروک آنجاق اونون بیر گون ده بیزیم قاپیمیزی چالاجاغینی بیلمیریک یادا بیلمک ایسته میریک.

بیر شاعیر ده بو دونیادان کوچدو. گونو گوندن میکانیک لشن دونیادان. هر گون داها دویغوسوزلاشان دونیادان بیر شاعیر بیر اینسان داها آزالدی.

یقین کی سیز بیلیرسینیز من کیم دن دانیشیرام!

آلله اونا رحمت ائله سین

من بویون یئنیلدیم

یئنیلمک راحات دئییل. هردن بوتون وجودونلا بیر  آماجا چاتماق اوچون چالیشیرسان. بیر ایش گورمک اوجون جانینی اووجونا آلیرسان. الیندن گله نی اسیرگه مه ییرسن.

اؤزنو اوتا- کؤزه ووروسان. آنجاق قارانلیغین ایچینده گیزله نن خایین کؤلگه لر بوتون چابالامالارینی اثرسیز قویور

من بویون بئله اولدوم. اوچ آیداچوخدور بوغولماق اوزره اولان بیر خیالی قورتاراماغا چالیشیردیم . آنجاق گوجوم یئتمه دی. من بویون یئنیلدیم

ایکی ترلان

* دوستوم مهدی نین دونیاسینا سئوینج گتیرن کیچیک گونش خانیم اوچون آیدین گله جک آرزیسیلا

ساعات قاباغیندان کئچن لر هر گونه تای عجله ایله ایشلرینین دالیسیجا گئدیردیلر. بلدیه بیناسینین ساعاتی سککیزه یاخینلاشیردی. ب.ر.ت اوتوبوسو دایاندی. ترلان چانتاسینی چینینه سالیب اوتوبوسدان دوشدو.
ترلان اوتوبوسدان دوشر - دوشمز خیاوانی کئچرک ساعات بیناسینا باخدی . ساعات سکیزدی. ساعات زنگینین زیل سسی اونو اؤزونه گتیردی. تله سیک ساعات میئدانینی کئچیب ثبت احوال کوچه سینه دوغرو یولا دوشدو.
ثبت احوال دا ثبت مامورلاریندان باشقا تقریبا هئچ کیم یوخودو. قاپیدا دوران مامورون یانینا گئدیب قاراداغلی لهجه سینه گیزلتمه یه چالیشاراق :« بغیشله یین! آدلارا هانسی اوتاقدا یئتیشرلر؟!» دئدی.
مامور الینده کی تبلیغ واراقلارینی بوکوب : « بورانین هر یانیندا آدلارا یئتیشرلر. سیزین ایشینیز نه دی؟» دئدی.
ترلانین یاناقلاری بیر آز قیزاردی:« من آدیمی ده ییشمه یه گلمیشم.»
مامور گؤزونون آلتیندان ترلانا باخیب: « سولدا دیب اوتاغا گئت!» دئدی.
ثبت احوالین شوشه دووارلی اوتاقلاری هامیسی بیربیرینه بنزه ییردی. ترلان سونونجو اوتاغا گیردی. آریق قارا قاش گوز و اوزون بیر کیشی ماسانین آرخاسیندا اوتورموشدو.
: «بویور باجی! نه ایشین وار؟»
- « گلمیشم آدیمی ده ییشم!»
: «آدینیز نه دیر؟»
- « ترلان»
کیشی بیر آز دوشونوب ترلانین اوزونه باخمادان الینده کی کلاسورو بوکدو. ترلان کیشی یه باخدیقدا اونون قاش قاباقلی اولدوغونو گؤردو.
- « آدیمی نئجه ده ییشه بیلرم؟ مدراک نه لازیمدی؟»
کیشی ترلانین اوزونه باخدی. سانکی بیر شئی لر دئمک ایسته دی. آنجاق سؤزونو اوددو: « هر شئی دن قاباق بیر کاغیذدا ایسته یینیزی یازین. آدینیزین ده ییشمه ندنی نی ده یازین و تازا آدینیزی دا کاغیذا یازین.»
ترلان کیشی دن بیر کاغیذ آلیب یازدی.
« بسمه تعالی - مسئول محترم ثبت احوال تبریز اینجانب ترلان احمدخانی متولد ۱۳۵۳ ساکن تبریز با توجه به اینکه در حال حاضر کلمه ترلان منسوخ گردیده است درخواست دارم تا نام من از ترلان به صنم تغییر یابد. امضا ترلان احمد خانی»
کیشی نامه نی اوخودو:« آدینیزی ده ییشمک اوچون اعلانات تابلوسوندا یازیلان مدرک لرین هامیسنی حاضیرلاییب و منه گتیرین.»
ترلان سوروشدو:« نئچه گون چکر تا آدیم ده ییشسین!؟»
:«بیر آی قدر چکه جک»
ترلان راحات نفس چکدی. آخی هله محرم آیی ایدی و اونون ائلچی سی سفر آییندان سونرا گله جک ایدی. سئوینجک دووارداکی یازی لارا گؤز دولاندیردی. داها صنم اولاجاغدی. کیمسه اونا آدینا گؤره سؤز باغلامایاجاغدی. بونلاردان علاوه ائلچی لره آدینین نه اولدوغونو سؤیله مک دن اوتانمایاجاقدی.
ترلان دوواردا یازیلان مدرک لرین هامیسینی کیفینده گتیرمیشدی. آنجاق ثبت احوالین حسابینا بانکا پول توکمه لی ایدی. حساب نؤمره سینی یازماق اوچون کاغیذ آختاردی.
ثبت احوال کارمندی میزین اوستونده بیر کاغیذ گؤتوروب و ترلانا دوغرو اوزالتدی. ترلان کاغیذی آلدی و لازیم اولان مدرک لرین سیاهه سینی یازماغا باشلادی.
بیر کیشی اوتاغین قاپیسینی دؤیوب ایچری گیردی. اوجادان سالام وئریب ثبت مامورونا اوزون دوندیریب دئدی:« آغا من گلمیشم نوه مه سیجیللی آلام».
ثبت مامور کیشینین اوزونه باخیب سانکی اونو بیر یئرده گؤرموشدو:« موبارکدی. اینشالله  قدمی خوش اولسون.»دئدی
 کیشی پالتوسونون جیبینی گزیردی. ثبت مامورو اونا باخیب:« آغا ائله بیل من سیزی بیر یئرده گورموشم؟»: دئدی
کیشی مامورا باخیب دئدی:« اولابیلر. من بیلی یورددا درس دئییرم. بلکه جوانلیقدا منیم شاگردیم اولموشسونوز!من دوکتور مقدسی یم» دئدی.
ثبت احوال مامورو اؤزونو ییغیشدیریب دئدی :« من ده قاضی یم! یوخ جناب دوکتور من سیزین شاگردینیز اولمامیشام. ولی ایندی سیزی خاطیرلادیم. سیز حقوق فاکولته سینین اوستادلاریندانسینیز. ائله دی؟!»
دوکتور گولومسه ییب:« جناب قاضی منیم  بیر نوه م اولوب. آتاسی ماموریت ده، من اوشاغین خسته خانا مدرک لرینی گتیرمیشم. داها نه لازیم دی تا بیر سیجیللی آلام!»
: جناب دوکتور باشقا آدام اولسایدی دئییردیم کی آتاسی اولماسا سیجیللی وئرمک اولماز ولی بیر حقوق استادینا بئله سؤز دئمک اولماز!»
- ساغ اولون
: گول نوه نیزین آدی نه دی
- ترلان! بو آد کی غیر قانونی دئییل؟!
ثبت مامورو گولومسه ییب دئدی یوخ! ایندی داهی ثبت احوال دا بیر کیتاب وار و خوشبخت لیک له بیزیم یئرلی آدلاریمیزین چوخوسو بو کیتابدا وار. احیانا بعضی آدلار دا اوردا اولماسا کمیسیونا قویولار. متخصص لر اونون یئرلی آد اولدوغو نون قناعتینه گلسه لر او آد دا بو کیتابا داخیل اولار.!
ترلان آقای قاضینین و دوکتورون دانیشیقلارینی ائشیدیردی. باشینی اعلان تابلوسوندان دؤندریب اختیار سیز دوکتوره باخدی. دوکتور ترلانین اونا باخماسینی گؤردو:« قیزیم نییه تعجب ائدیرسن ترلان بیزیم اصیل آدلاریمیزداندی.» دئدی
ترلان دینمه دی. ثبت ماموروندان تشکور ائدیب اوتاقدان چیخدی.
بیر نئچه ثانیه سونرا ترلان اوتاغا قاییتدی: « آغا منیم درخواستیمی اؤزومه وئره بیلر سینیز؟!»
آقای قاضی درخواستی میزین اوستوندن گؤتوردو. بیر نئچه ثانیه مکث ائدیب ماساسینین کئشوسونو آچدی. کئشودان بیرکیتاب چیخارتدی. "درخواستی" کیتابین آراسینا قویوب ترلانا وئردی.
ترلان کیتابین اوزونو هوججوله ییرک اوخوماغا چالیشدی
تورک آدلار سؤزلویو- رضا غفاری

---

*رحمتلیک محمد قاضی  داهی آرامیزدا یوخدو. اونون روحو شاد اولسون
* اینسانلیغی رحمتلیک رضا غفاری دا گوردوم. بویوک اینسانلار هئچ زامان اونودولمازلار