اؤلوم يوخوسو

   آييلديقدا اؤزومو اوتاغين دامينا زنجيرله آسيلميش الكتريك لامپ­لارينين يانيندا داما ياپيشميش گؤردوم. ندن باشقا جيسم­لر كيمي يئر جاذبه­سينين تاثيرينده يئرين اوستونده اولماديغيمي آنلاياجاق وضعيتده دئييلديم.

   هله قارما- قاريشيق دوشونوردوم. بيردن اوستدن اوتاغا باخاندا اؤزومو ياتاغيمدا گؤردوم. من بوردا، اوتاغين داميندا لاپ الكتريك چيراغينين يانيندا ايديم. بس ياتاغيمدا ياتان كيم ايدي؟ بير آن يوخو گؤردويومو دوشوندوم.

   آنجاق بو وضعيت اصلا يوخويا اوخشاماييردي. اوتاغين پنجره­سي ياريا قدر آچيلميشدي. بير نئچه خزل ده ائله پنجره­دن اوتاغين ايچينه تؤكولموشدو. دووارداكي تقويم جوما آخشاميني گؤستريردي. تئلويزيون هميشه‌يه تاي آچيقدي. آنجاق اونا قولاق آسديقدا بوگونون شنبه اولدوغونو آنلاديم.  پنجره‌دن سرين بير يئل اسيب پرده‌لري اويناديردي.

  هاوا قيزارميشدي. عينالي­نين داليسيندا گيزلنن گونش ياواش- ياواش شهري ايشيقلانديريردي. گونشين چيخماسيني بوراخيب، دؤنوب بير داها دا جمده‌ييمه باخديم.

     «يوخسا من اؤلموشم؟» دئيه، جمده­ييمه ياخينلاشديم. اوزومه ديقتله باخديقدا اؤلدويومو آنلاديم. گؤزلريم پاريلتي­دان دوشموشدو. آغزيم بير آز آچيق قالميش و يئريمده، ائله يوخلاديغيم زامان روحوم گؤوده‌دن آييريلميشدي.

     تئلويزيون و دووارداكي تقويمي توتوشدوروب، اوچ گوندن بري اؤلدويومو آنلاديم. بو اوچ گونده هله جمده‌ييم قوخولانماميشدي.

    بيردن دوشونمه­يه باشلاديم. ياشاديغيم بوتون گونلر، ساعات­لار و ثانيه­لر گؤزومون اؤنونه سريلميشديلر. بعضي زامان­لار چوخ دوشونوب آنجاق خاطيرلايا بيلمه­ديييم خاطيره­لر سانكي ائله اونلاري ايندي ياشاييرام، گؤزومون قاباغيندان كئچيرديلر.

   اوشاق ايكن آنام: « عزرائيل اينسان­لاري ايكي واسيطه ايله اؤلدورر.» دئيردي. عزرائيل ياخشي اينسان­لارين روحونو آلماق اوچون، اونلارين بورونونون آلتينا بير قيزيل گول توتارميش. بئله ايسه ده اونون روحونو بدنيندن آييريب جنت ماوايه آپارارميش. عزرائيل گئتديكدن سونرا دا بو قيزيل گول قوخوسو، گونلرجه اؤلو و او اؤلدويو اوتاقدان چكيلمز ايميش.

    آنجاق گوناهكارلارين جانيني آلماق اوچون عزرائيل آلتين خنجرله اونلارين بوغازلاريني كسرميش.عزرائيل بير گوناهكارين باشيني كسديكده اونون قاني آخيب، هرياني بولايارميش. بو قان گؤزه گؤرونمز بير قان ايميش. حتي بيز بو باشين كسيلديييني ده بيلمز ايميشيك. ائله بونون اوچون ده اؤلويه توخونان هركيم مئييت غوسلو آلمالي ايميش!

    اوتاغي قوخولاماغا باشلاديم. قونشونون سؤيود آغاجينين قوخوسو گليردي. حتي اوتاقداكي كيرلي پالتارلاريمين دا قوخوسونو آنلايرديم. آنجاق بو جنت‌دن گلن قيزيل گولون قوخوسونو آلابيلمه‌ديم.

   اؤزومو آلداتمامالييديم. من بو قيسا عؤمرومده چوخلو گوناهلار ايشله­ميشديم. بلكه‌ده بونون اوچون منيم جانيم قيزيل گول قوخوسويلا يوخ، عزراييلين آلتين خنجري ايله گؤودمدن آييريلميشدي.

   بوغازيما باخديم. آنجاق اورادا بير خنجر ايزينه راستلاماديم. حتي يئرده روح­لارا كيمي گؤرنمز قانلاري دا گؤره بيلمه­ديم.

  منيم باشيما نه گلميشدي؟ نييه جانيم گؤوده­مدن آيريلاراق. هله ده بو دونيادا سرگردان قالميشدي. فيكريمدن، تانرييا يالواريب مني بير داها دا حياتا قايتارماغيني ايستمك كئچدي.

    آنجاق بو قدر گوناه ايشلميش بير اينسانين ايستك­لرينه تانري قولاق آسارمي؟ يوخ! من اؤزومده تانرييا يالوارما جسارتيني تاپا بيلمه‌ييرديم.

    دوغرودان دفعه­لرله ايشيم بركه دوشنده تانرييا يالواريب ايشيمي دوزلدرسه، آياغيمي ترسه  آتماياجاغيمي دئميشديم.

هر دفعه ده اؤز سؤزومون آلتينا وورموش و گوناه ايشله‌ميشديم. ايندي نه تانري منه اينانار، نه ده من اؤزومه.

   دهشت بوتون جانيمي آلميشدي. بيردن هندورده‌كي بوتون سس‌لر كسيلدي. سانكي دونيادا سس آدلي بير شئي يوخموش كيمي، سكوت هرنه‌يي اؤز ايچينه آلدي. عئينالي‌يا باخديم.

   شهرين گؤيونو قيزاردان گونش ياواشجا عينالين داليسيندان چيخيردي. من بيلمه‌دن روحوم ياواشجا بير دومانين اورتادان يوخ اولماسي كيمي اورتاليقدان ايتيردي.

    روحوم اورتاليقدان ايتديكجه، اوزومون رنگي دَيييشيردي. سس‌سيزليك آرادان گئديردي.  منيم جانيم بير دؤنه ده گؤوده‌مه قاييتميشدي. بو دؤنه‌ني  سايسام، جانيمين بدنيمدن آيرلماسي يئددي دؤنه داها تكرار اولموشدو.

پنجره آچيقيدي. بير نئچه يارپاق اوتاغيمين ايچينه تؤكولموشدو. يورقانيمي اوستومه چكديم. يئريمدن قالخماغا جسارتيم يوخويدو.

سون