ایکی ترلان

* دوستوم مهدی نین دونیاسینا سئوینج گتیرن کیچیک گونش خانیم اوچون آیدین گله جک آرزیسیلا

ساعات قاباغیندان کئچن لر هر گونه تای عجله ایله ایشلرینین دالیسیجا گئدیردیلر. بلدیه بیناسینین ساعاتی سککیزه یاخینلاشیردی. ب.ر.ت اوتوبوسو دایاندی. ترلان چانتاسینی چینینه سالیب اوتوبوسدان دوشدو.
ترلان اوتوبوسدان دوشر - دوشمز خیاوانی کئچرک ساعات بیناسینا باخدی . ساعات سکیزدی. ساعات زنگینین زیل سسی اونو اؤزونه گتیردی. تله سیک ساعات میئدانینی کئچیب ثبت احوال کوچه سینه دوغرو یولا دوشدو.
ثبت احوال دا ثبت مامورلاریندان باشقا تقریبا هئچ کیم یوخودو. قاپیدا دوران مامورون یانینا گئدیب قاراداغلی لهجه سینه گیزلتمه یه چالیشاراق :« بغیشله یین! آدلارا هانسی اوتاقدا یئتیشرلر؟!» دئدی.
مامور الینده کی تبلیغ واراقلارینی بوکوب : « بورانین هر یانیندا آدلارا یئتیشرلر. سیزین ایشینیز نه دی؟» دئدی.
ترلانین یاناقلاری بیر آز قیزاردی:« من آدیمی ده ییشمه یه گلمیشم.»
مامور گؤزونون آلتیندان ترلانا باخیب: « سولدا دیب اوتاغا گئت!» دئدی.
ثبت احوالین شوشه دووارلی اوتاقلاری هامیسی بیربیرینه بنزه ییردی. ترلان سونونجو اوتاغا گیردی. آریق قارا قاش گوز و اوزون بیر کیشی ماسانین آرخاسیندا اوتورموشدو.
: «بویور باجی! نه ایشین وار؟»
- « گلمیشم آدیمی ده ییشم!»
: «آدینیز نه دیر؟»
- « ترلان»
کیشی بیر آز دوشونوب ترلانین اوزونه باخمادان الینده کی کلاسورو بوکدو. ترلان کیشی یه باخدیقدا اونون قاش قاباقلی اولدوغونو گؤردو.
- « آدیمی نئجه ده ییشه بیلرم؟ مدراک نه لازیمدی؟»
کیشی ترلانین اوزونه باخدی. سانکی بیر شئی لر دئمک ایسته دی. آنجاق سؤزونو اوددو: « هر شئی دن قاباق بیر کاغیذدا ایسته یینیزی یازین. آدینیزین ده ییشمه ندنی نی ده یازین و تازا آدینیزی دا کاغیذا یازین.»
ترلان کیشی دن بیر کاغیذ آلیب یازدی.
« بسمه تعالی - مسئول محترم ثبت احوال تبریز اینجانب ترلان احمدخانی متولد ۱۳۵۳ ساکن تبریز با توجه به اینکه در حال حاضر کلمه ترلان منسوخ گردیده است درخواست دارم تا نام من از ترلان به صنم تغییر یابد. امضا ترلان احمد خانی»
کیشی نامه نی اوخودو:« آدینیزی ده ییشمک اوچون اعلانات تابلوسوندا یازیلان مدرک لرین هامیسنی حاضیرلاییب و منه گتیرین.»
ترلان سوروشدو:« نئچه گون چکر تا آدیم ده ییشسین!؟»
:«بیر آی قدر چکه جک»
ترلان راحات نفس چکدی. آخی هله محرم آیی ایدی و اونون ائلچی سی سفر آییندان سونرا گله جک ایدی. سئوینجک دووارداکی یازی لارا گؤز دولاندیردی. داها صنم اولاجاغدی. کیمسه اونا آدینا گؤره سؤز باغلامایاجاغدی. بونلاردان علاوه ائلچی لره آدینین نه اولدوغونو سؤیله مک دن اوتانمایاجاقدی.
ترلان دوواردا یازیلان مدرک لرین هامیسینی کیفینده گتیرمیشدی. آنجاق ثبت احوالین حسابینا بانکا پول توکمه لی ایدی. حساب نؤمره سینی یازماق اوچون کاغیذ آختاردی.
ثبت احوال کارمندی میزین اوستونده بیر کاغیذ گؤتوروب و ترلانا دوغرو اوزالتدی. ترلان کاغیذی آلدی و لازیم اولان مدرک لرین سیاهه سینی یازماغا باشلادی.
بیر کیشی اوتاغین قاپیسینی دؤیوب ایچری گیردی. اوجادان سالام وئریب ثبت مامورونا اوزون دوندیریب دئدی:« آغا من گلمیشم نوه مه سیجیللی آلام».
ثبت مامور کیشینین اوزونه باخیب سانکی اونو بیر یئرده گؤرموشدو:« موبارکدی. اینشالله  قدمی خوش اولسون.»دئدی
 کیشی پالتوسونون جیبینی گزیردی. ثبت مامورو اونا باخیب:« آغا ائله بیل من سیزی بیر یئرده گورموشم؟»: دئدی
کیشی مامورا باخیب دئدی:« اولابیلر. من بیلی یورددا درس دئییرم. بلکه جوانلیقدا منیم شاگردیم اولموشسونوز!من دوکتور مقدسی یم» دئدی.
ثبت احوال مامورو اؤزونو ییغیشدیریب دئدی :« من ده قاضی یم! یوخ جناب دوکتور من سیزین شاگردینیز اولمامیشام. ولی ایندی سیزی خاطیرلادیم. سیز حقوق فاکولته سینین اوستادلاریندانسینیز. ائله دی؟!»
دوکتور گولومسه ییب:« جناب قاضی منیم  بیر نوه م اولوب. آتاسی ماموریت ده، من اوشاغین خسته خانا مدرک لرینی گتیرمیشم. داها نه لازیم دی تا بیر سیجیللی آلام!»
: جناب دوکتور باشقا آدام اولسایدی دئییردیم کی آتاسی اولماسا سیجیللی وئرمک اولماز ولی بیر حقوق استادینا بئله سؤز دئمک اولماز!»
- ساغ اولون
: گول نوه نیزین آدی نه دی
- ترلان! بو آد کی غیر قانونی دئییل؟!
ثبت مامورو گولومسه ییب دئدی یوخ! ایندی داهی ثبت احوال دا بیر کیتاب وار و خوشبخت لیک له بیزیم یئرلی آدلاریمیزین چوخوسو بو کیتابدا وار. احیانا بعضی آدلار دا اوردا اولماسا کمیسیونا قویولار. متخصص لر اونون یئرلی آد اولدوغو نون قناعتینه گلسه لر او آد دا بو کیتابا داخیل اولار.!
ترلان آقای قاضینین و دوکتورون دانیشیقلارینی ائشیدیردی. باشینی اعلان تابلوسوندان دؤندریب اختیار سیز دوکتوره باخدی. دوکتور ترلانین اونا باخماسینی گؤردو:« قیزیم نییه تعجب ائدیرسن ترلان بیزیم اصیل آدلاریمیزداندی.» دئدی
ترلان دینمه دی. ثبت ماموروندان تشکور ائدیب اوتاقدان چیخدی.
بیر نئچه ثانیه سونرا ترلان اوتاغا قاییتدی: « آغا منیم درخواستیمی اؤزومه وئره بیلر سینیز؟!»
آقای قاضی درخواستی میزین اوستوندن گؤتوردو. بیر نئچه ثانیه مکث ائدیب ماساسینین کئشوسونو آچدی. کئشودان بیرکیتاب چیخارتدی. "درخواستی" کیتابین آراسینا قویوب ترلانا وئردی.
ترلان کیتابین اوزونو هوججوله ییرک اوخوماغا چالیشدی
تورک آدلار سؤزلویو- رضا غفاری